لاعرفين نعيش جوه ولا بره

حبيت اناقش قضية خطيرة جدا واخد رأيكم فيها
وهى المعاملة السيئة اللي بيتلقاها المصريين في الخارج وخاصة الدول العربية

اكيد معظمكم سمع عن اعتقال وتعذيب عاملين مصريين في الكويت
وهما جمال محمد عبد الشافي وحسام محمد سليم
اللي اعتقلوا بتهمة مخالفة قوانين الاقامة
ويقال ان قضية هذين الشابين قوبلت باهتمام اعلامي واسع وبتنديد رسمي وشعبي في مصر

وكمان المشاجرة اللي حصلت بين عمال مصريين واسرة ليبيه في بلدة بني وليد الليبية
واللي اتصاب فيها عدد كبير من المصريين وكمان تم القبض عليهم
يعني اتصابوا واتقبض عليهم والليبين اخدوا حقهم تالت ومتلت

والنهارده فى برنامج مصرى شفت مصريين بيتكلموا هنا فى مصر بعد ترحيلهم من ليبيا
لكن الغريب في الامر ان أحمد القويسنى مساعد وزير الخارجية للشئون القنصلية والمصريين بالخارج نفى ده وقال انه محصلش وان مفيش مصريين تم ترحيلهم امال دول وصلوا هنا ازاى

انا كل اللي عايزة اعرفه احنا فين من ده كله وليه المصريين بالذات اللي بيتعاملوا كده
والحكومة كمان مش بتفكر تجبلهم حقهم امال السفارة بتاعتنا اللي فى كل الدول دى بتعمل ايه
اشمعنى لما اى واحد من اى بلد بيحصلوا حاجة هنا في مصر الدنيا بتقوم ومش بتقعد؟!

ياريت اعرف رأيكوا فى الموضوع ده؟